東門國小的運動埕已經走了誠sian7(因為攏無其他的人咧慢跑，干焦有一寡仔老歲仔咧行路)，本來今仔日是想欲共囡仔載去泅水了後，我才閣騎車去附近的三民公園抑是體育場走，就算講是佇學校邊仔的街仔路走嘛較贏。毋過煞去予阮某拍銃，叫我莫烏白走去別位，我只好乖乖仔踮東門國小的運動埕走。

就是因為按呢，我實在是無啥想欲走偌濟，按算上濟走5K就好，日頭閣早早就出來，走無偌久就真猛，好佳哉我是真輕鬆咧走，才袂感覺遐艱苦。

奇妙的代誌發生啊，我平常時咧走攏會定定那看我的GPS手錶，看已經走幾K，今仔日本來就是按算走5K就好，所以手錶就是平均走一輾看一擺，就按呢一直看甲4點幾K的時陣，差不多賰1輾就會當完成5K，結果後一擺看的時陣煞是5.77K，予我驚一趒，哪會雄雄加1K?我敢有走甲遐輕鬆?走甲[忘我]的境界?戇神甲跳脫彼个時間佮空間，上少有5分鐘失去自我?我實在是想傷濟矣。

既然已經走6K，就規氣繼續走到10K，因為干焦有曝日頭的問題，今仔日的速度是走了真輕鬆的。

逐工走第2000工。