毅行者2012 隊號0254
2012年11月20日 1:42
第一段(09:00)起步,雖然非常興奮,但都依從預先訂定的策略,以慢行為主,但盡量跟貼0253隊。到西灣check point,嘉寶腳趾出現輕微問題,處理後冇事,大家稍作拉筋後再出發,這時已被0253隊超越咗。
第二段(12:19)開始多山路,雖然沿途風景優美,但路上人實在太多而步速慢,在路窄而不想塞人的情怳下,唯有專心過人趕路。住北譚凹的途中已開始肚餓,這是好現像,正明自己仲未爆。在北譚凹狼吞一個魚柳包、幾件餐蛋治、薯仔同可樂、換埋襪就再追住0253隊起步。
第三段(14:06)起步就上牛耳石山,上斜上石級自問係強項,所以見人過人，但落山時不小心踩咗石頭，拉傷咗左腳腳筋，痛到要企係度等一陣，好彩只係某角度先會痛，仲可以繼續行。到上雞公山時,可能實在上得太急,隊長豪仔開始有啲跟唔上,到雞公山頂時,振成已在前面不知幾遠,我心想就落到去都要等,不如在山頂等埋人齊先繼續。如是這嘉寶到了,但一直唔見豪仔縱影,足足二十分鐘後,先見佢用行山杖慢慢上緊來...原來豪仔佢因上得急而大腿抽筋,引至不幸扭傷膝頭而痛苦不堪。這時唯有叫嘉寶先行去下個CP,我就陪豪仔慢慢,幾步停一停地向水浪窩前進,到達時間比0253隊慢了一小時。豪仔萬千個不想放棄,但都被眾人勸退,流下了男兒睙,我們其他隊員都很難過,但這是當時唯一可行的做法。
第四段(18:01)起步,因耽誤了不少時間被0253隊拋離了近一個小時,我地餘下三人都有默契地加快了腳步,上山過人,平路慢跑,落山再過人,到基維爾營CP都唔使三個鐘,呢段麥徑最辛苦嘅路段就咁PB咗。
第五段(21:30),但support team要到獅子亭先見到,所以只稍作拉筋就起步。振成扮演電兔角色,我地繼續開快車半行半跑衝向獅子亭,不知不覺,原來比0253隊還要早到...食完叉燒飯飲完可樂又出發上筆架山,呢段中途開始發覺右腳中趾開始起水泡,上到筆架山CP先草草搵膠布貼完就算,係咁已拉下筋又開始落山。
第六段(00:20),由筆架山落到去大埔道,膝頭已經冇乜力,步速就更加維持唔到。之後去到上金山一段長命斜仲又風又雨,好彩件雨衣都頂得下凍,呢段路雖然辛苦,但我覺得係一種幾好嘅體驗,唔錯,幾好玩!去到城門再見到support team，真係好感動，因為之前嘅路實在太辛苦，本來冇乜胃口，但見佢地咁辛苦不眠一休係度等我地，點都要叫自已食多兩碗，好彩吃咗兩啖出前一丁之後有番啲胃口，最後真係食咗兩碗面同飲咗一鑵紅牛。換完乾衫，著埋件風褸就起行上針山。
第七段(01:56)，可能真係平時跑斜路訓線有素，上針山長命石級依然都仲可以追過幾隊，不過落草山時又多次不小心觸及左腳腳筋，加上呢條長命落石級，真係叫膝頭嗌救命。腳震震來到鉛礦坳，成個人已經冇晒心機，士氣好低，亦好唔想行，只有又係拉下筋，希望啲肌肉冇咁攰而再次起行。
第八段(05:27)，來到四方山時，上斜終於開始冇力啦，來到亂石林望上去見唔到頂嗰種失落真係難以彩容。辛辛苦苦上到頂之後有一段叫做平路，但多亂石，落完雨石面加一層泥令路面有好多陷阱，左腳筋又係呢度多次受害，加上右膝、腳板、起水泡嘅腳趾、頂到腫咗嘅腳趾公，感覺係痛、痛、痛、痛、痛！第一次萌生放棄唔行嘅念頭就係呢度。好彩呢度時候差不多天光，將睡魔略為打壓，到落斜時又見MJ同Esther沿路上來截我地陪行，有人support，成個人都精神好多！雖然步速已經好慢，仲總算可以落到去荃綿坳。好彩仲有胃口食野，呢個係最大喜信，因為咁樣先可以有力再行落去。因為腳板太痛，所以換番著asics2160，雖然頂腳趾，但好過腳板痛到行唔到。
第九段(08:24)，呢段開始有MJE陪行，沿途冇咁悶，整段路大部分都係落斜，對膝頭壓力好大，多得J做人肉行山杖，令條路易行好多。來到吉慶橋最後嘅CP，真係冇胃口食野啦，不過冇所謂啦，只淨返最後16k就完成。
第十段(11:14)，來到環塘算係主場，一心來到呢度一定要jog住去，所以一干人等起步就跑，出奇地原來跑先有力，行返而冇力，呢段超過5公里嘅路只用咗45分鐘仲完成，追番唔少時間。大長甘就唯有慢行上去，之後入大棠亦都半行半跑，出到馬路，見即將到尾，我摔先開始慢跑，大家亦跟住，最後700m見到輝輝係度等緊俾隊衫我地。換過隊衫，手拖住手，過終點！(13:27)
後感：其實毅行者要成功行得完，support team係功不可抹，心裏最感謝係公司呢組咁專業嘅支緩隊伍同埋最後來打氣陪行兼做電兔嘅MJE！今次因為速度行得快咗，所以過程比十年前第一次行辛苦好多，雙腳都出現不同程度損傷，希望唔會太影響來緊嘅馬拉松program。中途係有諗過放棄，不過來到而家兩日後再回想，問我仲會唔會去行多次？我答案是肯定的！不過要注明，如果下次再行，時間一定要向前推進，希望有日心口的號碼布都有一個"S"字！